:: sunnudagur, desember 26, 2004 ::

Eins og ég tók áður fram í jólakortum til ykkar flestra vil ég senda gleðikveðju til allra Ríkra. Ástæða þess að ég skrifa er að það er greinilegt að áhrif Ríkra eru ótrúleg og bæjar- og borgarstjórnarmenn víða um land fylgjast með síðunni okkar í von um að finna lausnir á öllum mögulegum vandamálum.

Í gær var ég í jólaboði í verksmiðjubæ úti á landi þar sem byggð hafa verið afskaplega ljót hús undanfarin ár. Mörg eru klædd áli og nánast gluggalaus og lóðastærð frekar smáleg. Þar eru raðhús sem minna á vinnuskúra amerízka hersins í Thule á Grænlandi. Auk þessarar viðbjóðslegu raðhúsalengju er fjöldinn allur af öðrum húsum sem eru byggð af álíka smekkvísi og hefur að mati margra orðið lýti á bænum en í stíl við verksmiðjublæinn sem lúrir yfir bæjarfélaginu.

Nú hafa bæjarstjórnaryfirvöld staðarins lesið bloggið okkar og tekið sönsum. Nú þurfa þeir sem ætla að byggja í þorpinu að framvísa teikningum og það þarf að samþykkja þær. Auðvitað voru íbúarnir undrandi á þessu háttarlagi. Ég benti þeim hins vegar á að brýn þörf væri á þessu og ég væri hissa að ekki sé búið að grípa til róttækari aðgerða til að stöðva þessa plágu. Ef ekki hefði verið gripið til þessara aðgerða mætta búast við að sjónmengunin af húsunum yrði jafnvel meiri en sú mengun sem kemur af eitrinu er verksmiðjurnar spúa frá sér. Vonandi sjá bæjarstjórnarmenn að sér í fleiri málum. Batnandi mönnum er bezt að lifa!

:: HauXon sunnudagur, desember 26, 2004 [+] ::
...
|