:: mánudagur, janúar 31, 2005 ::

Svona til að útkljá eitt enn máið þá eru líkurnar á því að fá Yatzy í einu kasti eftirfarandi:


6 á móti 6 í 5 veldi = 1 á móti 6 í 4 veldi = 0.0007716 = 1/6^4 = 6/6^5

:: Gmaríus mánudagur, janúar 31, 2005 [+] ::
...
|

Kæru fjelagar.

Þá er komið að því!

Nú mun ég kveða upp minn stóra dóm! Hmmm, hummm ,hmmmm.

"Eilífðar sólskin hins tæra huga" - ESOTSM er tær snilld!

Það þarf ekki fleiri vitnana við, þessi mynd er bara stórkostleg. Ó vá. Eða eins og KS orðaði það, "þetta er í fyrsta sinn sem ég get horft á ástarmynd með þér". Ekki ætla ég kannski að taka svo djúpt í árinni, engu að síður þá get ég ekki leynt aðdáun minni á þessari mynd.

Þetta fer að verða spurning um að taka Kristall og eyða úr minni hans öllum þeim slæmu minningum um ESOTSM sem þar fyrir finnast og koma þar fyrir "happy thoughts".

Happy thoughts amigos.

:: Gmaríus fimmtudagur, janúar 27, 2005 [+] ::
...
|

Hugmyndir Valgarduz sýna vel í verki hversu mikla skipulagshæfileika við Ríkir höfum. Leysum hlut eins og innkaup fyrir fjölda manns í einu skeyti. Ég tek undir þessar hugmyndir. Sameiginlegt matarboð á laugardag, þar sem við snæðum Beef a la Kristallur. H, K & V hittast á Skaganum á morgun at a disclosed location og versla meðlæti með herlegheitunum. Annars verða Ríkir sjálfum sér nægir og koma með svona almennan mat (brauð, vín, vindla og þorramat) á eigin ábyrgð.

Annars mæli ég með súrsuðum Selshreyfa fyrir Hrafnkel Vála. Ég er sannfærður um lækningamátt þeirra, hef varla veikst síðan ég neitti þeirra fyrir 2 árum.

Annars mæli ég með að látum stækka slotið á morgun svo að allir fái herbergi. Síðan er alltaf hægt að koma með tjald!?!

:: Gmaríus fimmtudagur, janúar 27, 2005 [+] ::
...
|

Ættum við ekki að plana sameiginlegt borðhald á laugardagskveldið? Spurning hvort einhver taki að sér innkaup, eða jafnvel að nokkur okkar mæli sér mót í Nettó á Skaganum eða Bónus í Borgarnesi á morgun. Að öðru leyti býst ég við að hver sjái um sig (þorramat, morgunmat, brauð, nammi o.s.frv.)

Annars er allt óvíst með brottför okkar af Skaganum á morgun. Hrafnkell Váli er ekki rétt heilsuhraustur þessa dagana og við verðum að sjá til hvernig þau mál þróast fram á morgundaginn. Einnig er óvíst með hingaðkomu barnfóstra helgarinnar þannig að þetta á allt eftir að koma í ljós.

Hvað með tímaplön annarra? Getum við verslað saman í Nettó á morgun?

:: Valgarduz fimmtudagur, janúar 27, 2005 [+] ::
...
|

Sælir fjelagar.

Þá styttist í mót vort. Núna er rétti tíminn til að pakka niður og kaupa mat. Líklega ekki spurning um sameiginlegt borðhald á laugardag og frjálst fæði á föstudag. Ég er búinn að borga fyrir slotið, heilar 14000 krónur. Það gera 2800 á Ríkan. Framlög til mín eru vel þegin inn á mína feitu bankabók. Ekki ætla ég að gefa upp númer hennar hér nema í dulmáli. Þið bara leggið inn á Íslandsbanka á Akranesi, höfuðbók tékkareikninga og númerið eru fyrstu 4 stafirnir úr kennitölu minni. Reikna ekki með öðru en að þið finnið svarið við þessu á um 0,36 sek.

Það er það stóra spurningin, hver ætlar að kaupa hvað. Hver sér um kálið og hver sér um skyrið? Ég held þó að það sé best að hver og einn kaupi sinn súrmat.

Ég kem með vindla fyrir ykkur fíklana.

:: Gmaríus miðvikudagur, janúar 26, 2005 [+] ::
...
|

Fyrst að kommentakerfið er í fokki þá birti ég lausn fokk gátunnar hér.

Kristallur var á rétti leið en það er hægt að gera þetta þannig að konurnar smiti ekki hvora aðra. Hér kemur lausnin. Afsakið orðbragðið en það er ekki auðvelt að tala í kringum þetta án þess að lausnin verði óskýr.

Þú ríður fyrstu konunni með tvo smokka hvern yfir öðrum. Þú tekur ytri smokkinn af og hefur þann innri áfram á þér. Svo tekur þú konu nr. 2 með honum. Af því loknu tekur þú smokkinn sem þú tókst af þér áðan og snýrð honum við og setur utan yfir þennan sem þú ert með á þér. Svo ríður þú konu númer þrjú.

Svo ætla ég þá að leggja fyrir ykkur aðra gátu af sama toga. Hvernig geta þrír menn stundað seif sex með einn konu og aðeins tveim smokkum? Þetta er nú ekki vandamál sem við Ríkir könnumst eins vel við. Lausnin er svipuð. :-)

:: HauXon mánudagur, janúar 24, 2005 [+] ::
...
|

Þar sem ég er í skemmtilegum áfanga (Strjál Stærðfræði) sem snýr að áhugamáli Ríkra hf. rökfræði, vil ég kasta fram rökfræðilegri gátu að hætti Raymon Smullyan. Þetta er líka einnig eitthvað sem við höfum allir velt fyrir okkur og er nauðsynlegt að vita ef aðstæðurnar koma upp.

Hvernig getur maður átt örugga kynmök (safe sex) með þremur konum ef hann á aðeins tvo smokka?

Jæja drengir hugsið!

:: HauXon mánudagur, janúar 24, 2005 [+] ::
...
|

Sá loksins ESOTSM. Það slær bjarma af Halógeninu. Kristallurinn tvístrast.

Skil ekki hvernig mér misfórst að muna eftir Keane - Hopes and Fears í tóngæðauppgjörinu mínu. Þá er hún komin á blað... eða skjá.

:: HauXon laugardagur, janúar 22, 2005 [+] ::
...
|

Hei...hvað varð um kommentin?????

:: Valgarduz fimmtudagur, janúar 20, 2005 [+] ::
...
|

Hér er mál sem mér hefur verið hugleikið annars lagið undan farin ár. Nú hafa skagamenn oft verið pirraðir út í "minni" lið sem ákveða að klæðast gulum treyjum oftast reyndar við bláar buxur. Oftar en ekki hafa verið á bilinu 2-4 lið af 10 í úrvalsdeildinni í gulum treyjum. Leiftur, Grindavík, KA og meira að segja voru Keflavík var einu sinni í gulu og svo auðvitað Skagamenn. Allir í þessum ömurlegu gulu treyjum. Ef við lítum aðeins út fyrir landssteinana, hvaða topp félagslið klæðast gulum treyjum eða svörtum buxum? Skagamönnum hefur oftar en ekki gengið betur í varabúningunum og spurningin er hvort að það sé ekki kominn tími á að skipta þessu glataða sjálflýsandi ógeðislit út? Flest lið sem eitthvað vit er í spila í rauðu, og annað hvort hvítum stuttbuxum eða rauðum ef þeir þurfa að sýnast hærri. Valsarar eru hvort eð er ekki neitt númer í íslenskri knattspyrnu lengur og er því tækifærið fyrir Skagann að ná litnum og vera liðið sem er þekktast á landinu fyrir að klæðast rauðu. Rauði liturinn er svo mikið hentugri fyrir áhorfendur sem þurfa ekki annað en að eiga einhverja flík í rauðu til þess að sýna stuðning sinn í verki. Enda hefur þessu viðbjóðarlitur sem Skaginn klæðist valdið því að stuðningsmenn liðsins sjást ekki í stúkunni. Úti á vellinum fá leikmenn ógleði er þeir sjá hvorn annan og vilja helst gefa á andstæðing. Það er kominn tími á að gefa þessum hallærislit frí og klæðast lit eins og "alvöru" fótboltalið!!

Eitt enn varðandi fótbolta. Þar sem ég hef nú búið í Vesturbænum nánast jafn lengi og á skaganum þá er ég nú hættur að hatast út í blessuðu KR-ingana. Nú gengur Skaganum ekkert svo vel þessa stundina. Væri ekki sniðugt að sameina liðin?? Bæði liðin eru "vestan læks" og ef kraftar liðanna yrðu sameinaðir mætti búa til lið sem væri ósigrandi á Íslandi og ætti jafnvel möguleika á að komast eitthvað áfram í Evrópukeppninni. Það væri hægt að gera búningana rauð-röndótta eins og AC-Milan. Rendurnar fyrir KR og rauður fyrir skagann. Ég held að þetta yrði heillaskref fyrir bæði lið, ekki síst fyrir skagann sem hefur ekki efni á að reka knattspyrnufélag í hæsta gæðaflokki og verður að treysta á að efnilegir strákar komi frá Húsavík eða Hólmavík til að spila með sér. Hér í bænum eru aftur á móti nóg af peningum til þess að halda í góða leikmenn og jafnvel kaupa þá. Það væri hægt að færa sætin úr stúkunni af skaganum hingað í bæinn og mála þau rauð. Ég sé ekkert vandamál fyrir fólk að keyra í hálftíma fyrir leik og er það ekkert verra en gerist í stóborgum erlendis, völlurinn hér í bænum er mikið betri og stúkan fallegri. Ef að skagamenn væru ekki svona þverir væri löngu búið að þessu enda eðlilegt þar sem Akranes er orðið eitt úthverfa Reykjavíkur.

:: HauXon fimmtudagur, janúar 20, 2005 [+] ::
...
|

Væri fróðlegt að heyra skoðanir Ríkra á neðanskráðu:

Forritarar, og þá sér í lagi vef-forritarar, eru ekkert annað en upphafnir tölvunördar sem á grundvelli hraðsoðinnar þykjustumenntunar telja sig geta sett sig á einhvern hærri hest en venjulegir tölvuáhugamenn. Ég veit ekki betur en að búið sé að gefa út ýmis forrit, eins og til dæmis Microsoft FrontPage, sem geri hverjum sem er kleift að útbúa og hanna sína eigin vefi með engri fyrirhöfn. Þessir blessuðu forritarar hafa bara engu að bæta við það sem venjulegur meðaljón getur gert í heimilistölvunni sinni. Svo fara þessir menn um víðan völl og rembast við að "selja þjónustu sína" fyrirtækjum sem allt eins vel gætu ráðið hvaða menntaskólanema sem er til að "hanna" vef fyrirtækisins á mun skemmri tíma og á einfaldari hátt en þessir sjálfskipuðu sérfræðingar á útseldu tímakaupi.

Svo eftir að þessir besservisserar eru búnir að setja upp sína dálka og reiti í einhverju upphöfnu FrontPage-forriti, þá koma svokallaðir "grafískir hönnuðir" til að toppa allt saman, ákveða hvernig draslið á að vera á litinn og rukka fimmtíuþúsundkall fyrir.

Að því gefnu að forritarinn hafi munað eftir að seifa.

Lifi FrontPage!!

:: Valgarduz þriðjudagur, janúar 18, 2005 [+] ::
...
|

Ég tek undir með Félaga Hauxyni og finnst hörundsæri "kennarana" frekar kómískur.
Svona til að útskýringar þá ætla ég að setja upp smá leikrit:

Ríkir setjast niður eftir vel heppnaðan fund og kveika á imbanum. Á Stöð2 rennur niður kredit listinn fyrir Lost Higway sem var önnur aðalmynd kvöldsins og viský-hrjúf rödd Bo Hall biður okkur að fara ekki of langt þar sem stórmyndin Eternal Sunshine of the Spotless Mind sé næst......en fyrst nokkrar auglýsingar!. Áfram rúlla fáeinar auglýsingar og loks kemur auglýsing sem Félagi Valgarduz kann greinilega ekki að meta og segir "Djöfull er þetta léleg auglýsing". Félagi Kristallur kinkar kolli og bætir við "ekki góð". Ég lít á þá forviða og segi: "Ég get nú ekki "borða undist" heldur yfir því sem lítur út fyrir að vera algerlega takmarkalaus heimska og fáfræði sumra í hópi Ríkra sem taka sig til öðru hvoru og fara að tjá sig um auglýsingamál".....minnugur þess að ég hafði áður heyrt þá ræða um auglýsingar án þess að spyrja mig áður - háskólamenntaðann manninn!?!

Sum fræði er bara merkilegri en önnur - ekki satt!

:: Halogen þriðjudagur, janúar 18, 2005 [+] ::
...
|

Jæja nú rennur blóðið í æðum Ríkra :-) Ástæða skrifanna var ekki að vera með dylgjur (nema að litlu leiti) heldur að fá svar sérfræðings Ríkra á því hversvegna 80 mín kennslu stundir er eru svona hentugar og ef til vill rök sem bæði mæla með og á móti breytingu á skólakerfinu í þá áttina. Þrátt löng bréf hefur þessari spurningu ekki verið svarað. Þess í stað eru menn gagnrýndir og sakaðir um vanvit fyrir að spyrja. Þetta snýst ekkert um vantraust á kennara eða ekki einu sinni um vantraust á skólakerfið. Málið snýst einungis um það að geta fært rök fyrir þeirri aðferðarfræði sem kosið er að nota við kennsluna. Svör eins og "Ég er sérfræðingur og mér er fyllilega treystandi til að meta þetta." Er svar við annarri spurningu sem var ekki borin upp og satt að segja fjarri tilgangi póstanna.

Það þarf ekki háskólamenntun í uppeldisfræðum til þess að hafa rétt til að velta fyrir sér þeim aðferðum sem notaðar eru við kennslu barnanna okkar. Það væri nær að fleiri foreldrar myndu nenna að velta þessu fyrir sér. Hér með skora ég á kennara að fagna áhuga foreldra á kennsluaðferðunum í stað þess að bíta til baka. Það mun alltaf vera einhver sem er gagnrýnir á leiðinlegan hátt og skiptir þá engu máli á hvaða starfsvettvangi það er. Eina leiðin til þess að eiga við slíkt er að fara ekki niður á sama level (það þarf þó ekki að taka fram að Ríkir eru allir á sama levelli og geta því sagt það sem þeir vilja við hvern annan).

Frám mínum bæjardyrum er þessi umræða aðeins æfing í rökfræðum fyrir Húsafellið. Sem vitringar fyrri tíma berjumst við Ríkir með orðum og hefur þessi umræða verið hörð en hin fínasta. Svo er það nú bara prýðilegt að umræða um uppeldis og skóla mál skuli vera lokið fyrir förina því hún hefur óþarflega oft verið rædd á vettvandi Ríkra að mínu mati. Við getum því verið einn allsherjar jákór í sveitinni og þreytt hvort annað á fróðleik sem vér erum sammála um.

Það er reyndar alveg rétt hjá þér að forritarar vista allt of sjaldan og nemur þjóðhagslegt tap af þessum völdum milljörðum króna. Svo er nú ekki svo langt síðan að auðmaður þurfti að koma flugmönnum og áhöfn til bjargar því að flugvélin var bensínlaus. Og að lokum þá er það rétt, það mætti nota rauðan meira í auglýsingar. Fyrirtæki vilja oft nota bláan í auglýsingarnar sínar af því að þau halda að blár sé traustvekjandi. Af þeim völdum er rauður ekki oft notaður í auglýsingar. Af þessu sannast að orð Valgarþuszar eru lög og því til einskis að mótmæla!!

I rest my case.

:: HauXon þriðjudagur, janúar 18, 2005 [+] ::
...
|

Kæru félagar

Ég ætla rétt að vona að umræðurnar í Húsafelli muni snúast um eitthvað annað en þessar ótrúlegu athugasemdir sem sumir Ríkra hafa látið falla um fagstétt undirritaðs - OG ÞRJÓSKAST ENN VIÐ þrátt fyrir ítarlegan fræðslupistil frá undirituðum. En nei, þegar einhver úr kennarastétt tekur sig til og reynir að fræða þá sem minna vita um kennslustörf, þá heitir það að vera "hörundsár" og að "verja gjörðir sínar". Íslenskir kennarar þurfa bara ekki að verja gjörðir sínar fyrir einum eða neinum; íslenskt skólakerfi er með þeim fremstu í heiminum og íslenskir kennarar langflestir til fyrirmyndar hvað varðar fagmennsku og heilindi í sínum störfum. Pistill minn í gær er því ekki kominn til af særindum á hörundi, heldur einfaldlega af því að ákveðnir aðilar í hópi Ríkra virtust þurfa á fræðslunni að halda. Komment Hauxonar um framsóknarmennsku dæma sig sjálf -vænir mig um forystuhollustu eftir pistil þar sem ég einmitt gagnrýndi harðlega úrelt kerfi sem skólunum er gert að starfa eftir. Hauxon rís síðan sjálfur til varnar þessu kerfi (sem hann Nota Bene hefur ekki minnsta vit á) og dirfist síðan að væna mig um forystuhollustu og framsóknarmennsku. Ég held að með svipuðum rökum mætti saka Hauxon um framsóknarmennsku þar sem hann sýnir hér í verki þann plagsið framsóknarmanna að mega ekkert aumt sjá án þess að sparka í það.

Ég held svei mér þá að komment Halogens um afturhaldskommatitti og samyrkjubú hafi verið málefnalegra og ígrundaðra en hinn langi pistill Hauxonar frá í gær.

En snúum okkur nú að efninu í bréfi Hauxonar:

Quote: Það vita það allir sem hafa hvort sem er setið í skóla eða unnið á almennum vinnumarkaði að vinnulotur mega ekki vera of langar. Ég man varla eftir að hafa unnið nokkurnsstaðar án þess að það séu skipulagðar pásur með reglulegu millibili eða mönnum lagt til að líta upp frá vinnunni í stutta stund ca. á klukkutíma fresti.

Svar: Auðvitað sjá kennarar í grunnskólum um það að þanþoli nemenda þeirra sé ekki ofboðið. Ef einhverjir hafa þekkingu og reynslu í því hvað hægt sé að bjóða nemendum uppá -OG HVAÐ EKKI- þá eru það einmitt kennarar. Eins og kom fram í bréfi mínu í gær þá er kennurum fullkomlega treystandi fyrir því að skipuleggja vinnulotur nemenda, hvort sem þær eru 40, 60, 80, 120, eða 240 mínútna langar, með þeim hætti að nóg sé um uppbrot og pásur þannig að athyglisspönn nemenda verði ekki ofgert. Áhyggjur almennings og blaðamanna af því að kennarar ofbjóði athyglisgetu nemenda sinna eru álíka gáfulegar og ef blöðin færu að birta fréttir af áhyggjum almennings yfir því að forritarar gleymi almennt að seifa, að grafískir hönnuðir gleymi almennt að nota rauða liti eða að flugmenn gleymi almennt að taka eldsneyti á vélar sínar.

Quote: Annað sem hefur versnað er agaleysið sem er að mestu leyti komið til vegna foreldranna en mikill fjöldi í hverjum bekk gerir kennaranum enn erfiðara að ráða við þetta.

Svar: Það er reyndar ekki rétt hjá Hauxyni að agaleysi hafi versnað í grunnskólum á síðustu árum. Umræður í fjölmiðlum um agaleysi grunnskólanemenda hafa hins vegar aukist mjög og að mörgu leyti skekkt myndina fyrir þeim sem vita ekki betur. Ég geri því ráð fyrir að Hauxon hafi þessar ranghugmyndir frá ósannri þjóðfélagsumræðunni því ekki hefur hann sjálfur mikla reynslu af samskiptum við grunnskólabörn. Ég heyri það glögglega hjá samkennurum mínum hér á Akranesi sem margir hverjir hafa kennt í áratugi, að agaleysi meðal grunnskólanemenda hafi náð algeru hámarki í kringum 1990(NB: rétt eftir að Ríkir útskrifuðust....Tilviljun?....Held ekki). Í dag eru vissulega alltaf einhver agavandamál sem við er að glíma, en sú tíð er liðin þegar kennarar og stjórnendur réðu ekki neitt við neitt og nemendur gátu vaðið yfir allt og alla eftir hentugleikum og oft með dyggum stuðningi foreldra. Ég verð að segja um unglinga í dag, a.m.k. hér á Akranesi, að upp til hópa er þetta kurteist fólk með góða hæfni í mannlegum samskiptum. Auk þess eru unglingar við 15 ára aldur komnir með miklu meiri reynslu og þekkingu á heiminum heldur en okkar jafnaldrar höfðu við sama aldur (Ríkir sjálfir að sjálfsögðu undanskildir). Einnig hefur umræða fjölmiðla þrátt fyrir allt komið einu góðu til leiðar, þ.e. að upp úr 1990 fóru þeir í auknum mæli að beina kastljósinu að hlutverki og ábyrgð foreldra í uppeldi barna í stað þess að skammast endalaust út í skólana fyrir agaleysið. Einnig hafa ýmis foreldrasamtök unnið gott starf í þessa veru, t.d. með auglýsingaherferðum fyrir verslunarmannahelgar, og hafa þessir aðilar vakið marga foreldra af áralöngum doða.

Quote: Ég hef ekki séð neitt sem bendir til þess að nútíma börn haldi athyglinni eitthvað lengur en fyrir 30 eða 100 árum, nema síður sé.

Auðvitað hafa börn ekki breyst að þessu leyti, enda hélt undirritaður því hvergi fram. Skólakerfið allt hefur hins vegar gerbreyst frá því sem var fyrir 30 árum, og hvað þá fyrir 100 árum og breytingarnar á skólakerfinu hafa allar verið á þann veg að auka vitund og virðingu fyrir andlegri og líkamlegri getu nemenda, virðingu fyrir fjölbreytileika nemenda og rétti þeirra til viðfangsefna við hæfi hvers og eins. Þessi faglega vitund kennara ætti að vera hverjum upplýstum manni næg trygging fyrir því að kennurum er best allra treystandi til að skipuleggja vinnulotur nemenda, sama hversu langur tími líður frá því vinnulotan hefst og þar til hún endar. Við þurfum ekkert miðstýrt kerfi frá Menntamálaráðherra til að segja okkur hversu lengi við megum hafa nemendur inni í skólastofu. Ég fullyrði það, að stutt næðisstund inni í kennslustofu í viðurvist kennarans, jafnvel með markvissum slökunaraðferðum undir leiðsögn kennarans, er miklu betri hvíld fyrir nemendur heldur en hinar venjubundnu frímínútur sem oftar en ekki einkennast af miklum látum, og jafnvel mjög streituvekjandi aðstæðum eins og áreitni og stríðni.

Quote: Það er auðvitað alveg rétt hjá þér við foreldrar höfum ekkert vit á uppeldi og ættum ekkert að vera að skipta okkur af því hvað er gert við börnin okkar þegar þau eru í skólanum. Auðvitað ekki!

Hafir þú, Hauxon, skilið orð mín með þessum hætti, þá ráðlegg ég þér að lesa bréf mitt aftur án þess að gera mér upp aðrar skoðanir en þær sem ég set þar fram svart á hvítu. Fátt er mikilvægara og dýrmætara fyrir kennara en gott samstarf og stuðningur foreldra. Í skólanum læra börnin að lesa og skrifa, öðlast ýmsan fróðleik um lífið og tilveruna og þjálfast í mannlegum samskiptum. Heima fyrir læra þau hins vegar þá lexíu að vera maður og skyldi síst vanmeta mikilvægi þeirrar lexíu. Það er því augljóslega hagur barnanna að á milli þessara mikilvægu mótunaraðila ríki traust og gott samband. Því miður er það ekki alltaf svo og ég er á þeirri skoðun að báðir aðilar; skólarnir og heimilin, þurfi að axla meiri ábyrgð en nú er gert til að bæta þetta samband.

Quote: Svo er það sú vörn er kennarar fara alltaf í ef eitthvað er minnst á störf þeirra. Ósjálfráð vörn er viðbrögð þess sem hefur eitthvað að fela eða eitthvað á samviskunni.

Margir foreldrar virðast misskilja hrapallega hlutverk sitt í samstarfi við skóla barna sinna. Í stað þess að koma í skólann með það að markmiði að stuðla að góðum samskiptum við kennara með hag barnanna að leiðarljósi koma margir foreldrar í vígahug inn í skólann, með það eitt að markmiði að taka nú kennarann almennilega í gegn - og þá yfirleitt með því að segja kennaranum fyrir verkum um það hvernig hann eigi að sinna sínu starfi. Svo þegar kennarar taka á móti þessum foreldrum og reyna að uppfræða þá um það sem fram fer í skólanum, þá heitir það að vera "hörundsár" og að "hlaupa í vörn". Þetta eru andsvör þeirra sem mæta skólunum og öllu sem þeim viðkemur með neikvæðu hugarfari frá upphafi og slíku fólki verður aldrei haggað með skynsamlegum rökræðum. Ég hefði að óreyndu aldrei trúað því að Hauxon væri í hópi svo þröngsýnna og skyndaufra manna og kýs reyndar enn að trúa því að hann sé að gera sér upp vanhugsað viðhorf, væntanlega til að reyna á rökfestu undirritaðs.

Quote: Ég reikna með að þar sem ég hef enn ekki neina háskólagráðu í neinu þá ætti ég bara að þegja því ég hef ekki vit á neinu sem hægt er að mennta sig í á háskólasviði.

Talandi um ótrúlega viðkvæmni!!! Það er ekki menntasnobb í mér, heldur einfaldlega það kerfi sem gildir í okkar vestræna menntaþjóðfélagi, sem segir að með háskólamenntun öðlist fólk ákveðin réttindi eða öllu heldur ákveðið forskot til að taka þátt í faglegum störfum og faglegri umræðu. Nú menntar fólk sig á ákveðnum sviðum, gerist þar með sérfræðingar á þeim sviðum og ætti því að hafa ákveðinn rétt til að tjá sig um það sem þessum sérsviðum viðkemur. Hins vegar skýtur svo skökku við þegar kennarar fara að tjá sig um sitt sérsvið og hrekja þær ranghugmyndir sem sumir eru óþreytandi við að viðra, þá virðist fólki fyrirmunað að geta litið á orð kennara sem fræðslu eða vinsamlega leiðsögn til þeirra sem minna vita um málið. Nei, kennarar eru jafnan vændir um að vera "uppstökkir", "hörundsárir" og í eilífri "vörn" með störf sín.

Hins vegar vil ég benda á, að fáir hafa haldið uppi meiri gagnrýni á íslenska grunnskólakerfið en Kennaraháskóli Íslands og ýmsir fræðimenn sem þar starfa. Sú gagnrýni hefur jafnan verið málefnaleg og studd öflugum rökum, enda hafa kennarar jafnan fagnað þessari gagnrýni og reynt að nýta hana til framþróunar í sínu starfi. Þetta tel ég sanna að grunnskólakennarar geta vel tekið gagnrýni og fagna henni svo fremi sem eitthvert vit er í henni. Blammeringar frá einhverjum grunnhyggnum besservisserum gegn störfum kennara geta hins vegar varla flokkast sem gagnrýni, enda sjaldnast studd neinum haldbærum rökum og besservisserarnir oftast sjálfir í slíkum vígahug að vonlaust er að reyna að hefja við þá vitrænar umræður.

Að lokum vona ég að umræður okkar í Húsafelli fái að þróast í einhverjar allt aðrar og skemmtilegri áttir en hér hefur gerst á síðustu dögum. Í fúlustu alvöru, þá finnast mér þetta álíka vitrænar umræður og að rökræða um það hvort forritarar almennt muni eftir að seifa, flugmenn muni eftir eldsneytinu og hönnuðir muni eftir rauða litnum. Að minnsta kosti skal ég lofa því, að reyni einhver að brydda upp á umræðum um skólamál þá mun ég ekki taka þátt í þeim enda væri það eflaust túlkað sem "hörundssæri" og "ósjálfráð vörn".

Hilsen

:: Valgarduz þriðjudagur, janúar 18, 2005 [+] ::
...
|

Það er alveg merkilegt hversu kennarar eru viðkvæmir gagnvart athugasemdum um störf þeirra. Ég verð að lýsa yfir undrun minni hörundssæri Valgarduzar og framsóknízkri vörn hanns á kerfi sem hann er ekki sjálfur ábyrgur fyrir. Þetta má ekki ræða það, verð að standa með forustunni viðhorf virðist ótrúlega virkt í mörgum þjóðfélagshópum. Lang best er að berja niður alla umræðu svo að hörundssárir þurfi ekki ekki að svara fyrir sig eða verja gjörðir sínar. Það sem mig undrar mest er að Ríkur skuli falla í þennan flokk og hélt ég að úrsögn hanns úr Framsóknarflokknum hafi einmitt sannað svo væri ekki.

1. Grunnskólabörn eru ekki í háskóla. Það vita það allir sem hafa hvort sem er setið í skóla eða unnið á almennum vinnumarkaði að vinnulotur mega ekki vera of langar. Ég man varla eftir að hafa unnið nokkurnsstaðar án þess að það séu skipulagðar pásur með reglulegu millibili eða mönnum lagt til að líta upp frá vinnunni í stutta stund ca. á klukkutíma fresti. Það ætti því ekki að skipta máli hvort um er að ræða kennara eða barn, upplit er nauðsynlegt til að halda dampinum.

2. Ríkir útskrifuðust úr grunnskóla fyrir 16-17 árum. Ég get tekið undir það að skólastarf hefur án efa batnað á undanförnum árum sérstaklega hvað varðar að gera nemandann meiri þáttakanda í kennslunni. En það kemur á móti að aukinn fjöldi nemenda í bekk gerir það að verkum að kennarinn getur ekki sinnt öllum börnunum eins vel. Annað sem hefur versnað er agaleysið sem er að mestu leyti komið til vegna foreldranna en mikill fjöldi í hverjum bekk gerir kennaranum enn erfiðara að ráða við þetta.

3. Skólum er enn gert að starfa eftir stífum og úreltum viðmiðum Það hefur ekkert breyst að til þess að læra þarf barnið að halda athyglinni. Það hefur ekkert upp á sig að segja að þetta eða hitt sé úrelt ef það er ekkert á bak við það. Ég hef ekki séð neitt sem bendir til þess að nútíma börn haldi athyglinni eitthvað lengur en fyrir 30 eða 100 árum, nema síður sé.

4. Kennarar eru háskólamenntaðir sérfræðingar. Ég skil nú ekki þessa ótrúlegu viðkvæmni. Ég reikna með að þar sem ég hef enn ekki neina háskólagráðu í neinu þá ætti ég bara að þegja því ég hef ekki vit á neinu sem hægt er að mennta sig í á háskólasviði. Ég gæti kannski helst talað um hvernig hvernig maður beitir skóflu eða hvort að kaffið sé nógu gott í kaffistofunni í verksmiðjunni sem ég ætti að vera að vinna í. Það er auðvitað alveg rétt hjá þér við foreldrar höfum ekkert vit á uppeldi og ættum ekkert að vera að skipta okkur af því hvað er gert við börnin okkar þegar þau eru í skólanum. Auðvitað ekki! Það eru nokkur atriði sem valda því að kennarar þurfa að svara oftar fyrir störf sín en aðrir sérfræðingar. Í fyrsta lagi þá eru allir landsmenn viðskiptamenn ykkar. Í öðru lagi þá er það staðreynd að enn eru fjölmargir leiðbeinendur að störfum í skólunum og þó það virðist standa til bóta þá hefur kennsla hingað til ekki alltaf verið í höndum "sérfræðinga". Svo er það sú vörn er kennarar fara alltaf í ef eitthvað er minnst á störf þeirra. Ósjálfráð vörn er viðbrögð þess sem hefur eitthvað að fela eða eitthvað á samviskunni. Þegar menn þurfa svo að slá um sig með menntun sinni og væna aðra um heimsku eða fáfræði bendir það enn frekar á að eitthvað sé að.

Ég tel aftur á móti að félagi Valgarduz hafi tekið dýpra í árinni til þess að koma betur til skila hversu mikið vit hanns er á málunum og metið svo að væg röksemdafærsla myndi ekki hitta marks þegar Ríkir eru annarsvegar. Þó svo að grunnskólakerfið sé að sogast ofan í niðurfallið og allir nemendurnir og kennarar með þá verður fjör að Húsafelli.

:: HauXon mánudagur, janúar 17, 2005 [+] ::
...
|

Mér sýnist Fjelagar að við séum komnir með eitt áríðandi mál á dagskrá hjá okkur, á fundinum góða.

Það er gerð nýrrar viðmiðunarstundaskrár og aðalnámsskrár fyrir grunnskóla landsins. Ekki virðist vera vanþörf á. Það ætti að reynast Ríkum létt verk, þar sem innan hópsins er að finna mikinn fjölda sérfræðinga og "sérfræðinga" á uppeldis- og kennslusviði. Ég legg til að við losum um þessi höft sem virðast vera að sliga alla skóla landsins um leið og við gefum kennurum tækifæri á að setja upp sína einkaskóla þar sem þeir geta beitt þeim nýungum og kenningum sem þeir telja bestar fyrir börn landsins. Þessi miðstýring skólakerfisins frá leppstofnun okkar, sveitarfélögum, virðist ekki vera að skila því sem við töldum að það myndi gera. Fjölgum skólunum og aukum úrvaldið.

Síðan legg ég til að auglýsingastofa Ríks taki að sér öll kynningarmál fyrir hagsmunasamtök kennara. Það er greinilegt af skrifum Valgarduz að kynningarmál þeirra eru í algjörum molum. Það er ekki nóg með það að meiri hluti þjóðarinnar finnist að kennarar hafi of há laun og séu bara alltaf í verkfalli sem standi í margar vikur. Heldur eru viðhorf almennings til þess sem fer fram í skólanum víst ekki í neinu samræmi við það sem þar fer raunverulega fram. Ef satt reynist þá er kennurum mikill vandi á höndum.

Hins vegar má vera að þær aðferðir sem kennarar þessa lands beita til að halda nemendum sínum í stólum í 80 mínútur, séu ekki þær sömu og foreldrar þessara barna telja bestar við uppfræðslu þeirra. Þeir [foreldrarnir] bera víst ennþá ábyrgð á uppeldi barna sinna. Og ég veit ekki til þess að því hafi verið breytt. Eða hvað?

Þetta skiptir hins vegar ekki máli þegar Ríkir hafa kveðið upp úr með það hvað sé best og hvernig eigi að gera hlutina. Og hana nú!

:: Gmaríus mánudagur, janúar 17, 2005 [+] ::
...
|

Ég get nú ekki "borða undist" heldur yfir því sem lítur út fyrir að vera algerlega takmarkalaus heimska og fáfræði sumra í hópi Ríkra sem taka sig til öðru hvoru og fara að tjá sig um skólamál. Póstur GMars og komment Hauxons hér að neðan eru hvorugum þessara annars stórgáfuðu einstaklinga til sóma og sýna í raun svart á hvítu hvers vegna þeim voru falin störf við fjarskiptakerfi og nauðungarflutninga í byltingaráformum Ríkra HF, en ekki áróðursuppeldi. Þau störf voru falin undirrituðum af þeirri ástæðu einni að undirritaður er best til þess fallinn af öllum Ríkum.

Í fyrsta lagi þurfa menn ekki að láta það koma sér á óvart að 1/5 hluti grunnskólabarna skuli eiga við geðræn vandamál að stríða. Varlega áætlað má alveg gera ráð fyrir að 1/5 hluti þjóðarinnar allrar stríði við einhvers konar geðræn vandamál og því skyldi það sama þá ekki eiga við um grunnskólabörn? Þau endurspegla auðvitað bara þjóðfélagið eins og það er. Sömu fjölbreytnina og við sjáum með þjóðinni allri getum við séð hjá grunnskólabörnum. Ég vil hins vegar benda á að hugtakið "geðræn vandamál" er ansi víðtækt og getur átt við allt frá hræðilegum sjúkdómum niður í minni háttar raskanir. Langflestir sem eiga við geðræn vandamál að stríða læra að lifa með sínum vandamálum og verða þrátt fyrir þau hamingjusamir og nýtir þjóðfélagsþegnar.

Steininn tekur þó úr þegar Gmar fer að tala um 80 mínútna kennslustundir og lætur frá sér fara þetta gullvæga komment: "Það þýðir að börnin þurfa að sitja kyrr og halda athygli í 80 mínútur!"
Ég verð greinilega að útskýra aðeins fyrir félögum mínum út á hvað grunnskólanám gengur. Kýs ég að gera það hér í nokkrum liðum:

1. Grunnskólabörn eru ekki í háskóla. Fyrirlestraformið er ekki algengasta kennsluaðferðin í grunnskólum. Börnin þurfa því ekki að "sitja kyrr og halda athygli" heilu kennslustundirnar, heldur er kennslustundin skipulögð sem vinnulota þar sem ört er skipt á milli viðfangsefna og vinnuaðferða.

2. Ríkir útskrifuðust úr grunnskóla fyrir 16-17 árum. Ég er ansi hræddur um að fæstir Ríkra hafi mikið kynnst skólastarfi í grunnskólum síðan og miði því fljótfærnislegar ályktanir sínar við eldgamla eigin reynslu. Við hin vitum að grunnskólinn hefur þróast og í rauninni gjörbreyst á þessum tíma. Í raun og veru má fullyrða að síðustu 10-15 árin hafi verið mesti framfaratími í íslenskum grunnskólum fyrr og síðar. Þetta felur m.a. í sér að námsefni, kennsluaðferðir og almennir starfshættir í skólum hafa þróast í þá átt að í stað einhæfrar mötunar á námsefninu fá grunnskólabörn nú í auknum mæli tækifæri til að rannsaka, uppgötva, gera tilraunir; í stuttu máli sagt að vinna á mun fjölbreyttari hátt en áður tíðkaðist.

3. Skólum er enn gert að starfa eftir stífum og úreltum viðmiðum Í viðmiðunarstundaskrá sem Menntamálaráðuneytið gefur út fyrir grunnskólana er gert ráð fyrir svo og svo mörgum kennslustundum á viku fyrir hvern árgang og þeim svo skipt niður á námsgreinar. Þessi stundafjöldi er ennþá miðaður við 40 mínútna kennslustundir sem er áratuga gamalt viðmið og kom einmitt upphaflega til vegna þess að 40 mínútur eru hámarks athyglisspönn meðalmanns. Þetta átti fullkomlega við á sínum tíma, enda gekk barnaskólakennslan þá út á það að börnin sátu kyrr, horfðu á kennarann og þurftu að halda athygli alla kennslustundina. Þessi gömlu viðmið eiga ekki við í nútíma skólastarfi. Grunnskólar nútímans skipuleggja lengri vinnulotur, hvort sem það eru 60 mínútur, 80 mínútur eða heill skóladagur, þannig að nemendur eru að vinna á fjölbreyttan hátt að viðfangsefnum sínum. Hins vegar verða skólarnir enn að sníða tímakerfi sín að þessum gömlu, íhaldssömu viðmiðum og með bréfi sínu hér að neðan hefur GMar sýnt að viðhorf hans líkt og þorra almennings eru alveg jafn gamaldags, úrelt og íhaldssöm.

4. Kennarar eru háskólamenntaðir sérfræðingar. Þó virðumst við kennarar vera í þeirri sérkennilegu stöðu að flestir telja sig hafa kunnáttu og forsendur til þess að segja okkur til um það hvernig við eigum að sinna okkar starfi - því fagi sem við höfum sérfræðimenntun til að sinna. Komment GMars um kennslu í grunnskólum eru álíka gáfuleg og ef ég héldi því fram, að flugmenn á Boeing vélum þyrftu bara að kunna tvær aðgerðir: annars vegar að kveikja á sjálfstýringunni og hins vegar að slökkva á henni. Ef við hins vegar veltum málunum aðeins fyrir okkur þá sjáum við í hendi okkar að ég veit sama og ekkert um flugvélar eða starf flugmanna og hef þess vegna litlar forsendur til að koma með svona fullyrðingar um þeirra störf. Nákvæmlega sama gildir um forsendur GMars til að fullyrða nokkuð um störf kennara. Þótt hann hafi sjálfur verið í grunnskóla á sínum tíma þá gefur það honum álíka mikla innsýn í störf kennara og reynsla mín sem flugfarþega gefur mér í störf flugmanna.
Staðreyndin er sú, að kennurum er betur ljóst en nokkruð öðrum hversu langt er hægt að teygja athygli eða þolinmæði nemenda. Við þurfum ekki á því að halda að einhver gauji út í bæ segi okkur að athygli nemenda okkar endist ekki nema í mesta lagi 40 mínútur. HALDIÐ ÞIÐ AÐ KENNARAR VITI ÞETTA EKKI!!! Kennarar eru fagmenn í kennslu, þeir vita nákvæmlega hvað hægt er að bjóða nemendum upp á og þeir vita nákvæmlega til hvers er hægt að ætlast af nemendum. Því mælist ég til þess að þeim fagmönnum sem sinna kennslu grunnskólabarna sé treyst fyrir því verkefni.

Vona ég að þeir sem lásu séu nú einhverju fróðari um þessi mál en taki ekki undir þá fáfræði og sleggjudóma sem birtust í skrifum félaga GMars hér að neðan.

:: Valgarduz mánudagur, janúar 17, 2005 [+] ::
...
|

Ég get nú ekki orða bundist lengur.

Ég var rétt í þessu að horfa á frétt í sjónvarpinu þar sem það kom fram að 1/5 barna á grunnskólaaldri eigi við einhver geðræn vandamál að stríða. Það er náttúrulega hið versta mál ef satt reynist. Það var hins vegar annað í fréttinni sem fangaði athygli mína, það að einhverjir grunnskólar eru byrjaðir með 80 mínútna kennslustundir. Það þýðir að börnin þurfa að sitja kyrr og halda athygli í 80 mínútur!

Hvað heilvita langskólamenntaða manni með sérþekkingu á kennslufræðum og uppeldi dettur þetta í hug? Eru þessir aðilar ekki í lagi? Að ætlast til þess að börn geti setið kyrr í þennan tíma og lært eitthvað að viti er að mínu mati einhver mesta þvæla sem ég hef heyrt. Það er ekki nema von að börn landsmanna eigi í einhverjum vandræðum! Ég hélt að menn vissu það að hingað til hefur það verið talið ákjósanlegt að hafa kennslustundir/fyrirlestra eða hvað annað ekki lengra en í kringum 40 mínútur. Annað er bara waste of time, effort and taxpayers money!

Og hana nú!

:: Gmaríus sunnudagur, janúar 16, 2005 [+] ::
...
|

Sælir Fjelagar.

3/5 Ríkra ákváðu í gær að taka forskot á sæluna sem bíður okkar í lok mánaðarins. Hittumst við í kastala mínum á holti skóla. Við fengum okkur nokkur glös af Tonic og Coke og héldum síðan út í náttmyrkrið. Við ákváðum að breyta aðeins til og kynna okkur fjölmenningarsamfélagið Íslands og fórum af því tilefni á Alþjóðahúsið við Hverfisgötu. Þar fengum við okkur meira Tonic og Coke. Eftir veru okkar þar höfum við ákveðið að veita þessum stað blessun okkar. Síðan var haldið aftur út í náttmyrkrið þar til við fundum hinn margrómaða Vöffluvagn. Þar fengum við okkur eina Klassíska og héldum svo heim.

Mér skilst að þessi vaffla hafi lagst eitthvað misjafnlega í menn, að minnsta kosti voru einhverjir okkar ekki uppá sitt besta í morgun.

:: Gmaríus sunnudagur, janúar 16, 2005 [+] ::
...
|

Kæru kammeratísku meðbræður og höfðingjar. Í tilefni vetrarþings Ríkra símaði ég í firmað Afþreyingarfélagið sem annast snjósleðaferðir með fyrirmenni og útlendinga. Því miður er engin starfsemi hjá þeim uppi á Langjökli fyrr en í Apríl/Maí. Símaði ég auk þess í sjálft Húsafellið og rak minni þess er ég ræddi við ekki til neinna skipulagðra eða óskipulagðra skemmtiferða um vetrartíman á svæðinu. Við verðum því að eyða gróðanum í að kaupa veglega í matinn og drekka því mun meira til þess að lina þjáningarnar eftir átið. Við erum hinsvegar fyllilega fær um að skemmta okkur sjálf án hjálpar almúgans og því ætti að vera nóg að taka gönguskóna og hlý föt með.

Getum vér haldið hvort öðru selskap með bröndurum og ýmiskonar skemmtilegheitum í bústaðnum. Þegar að stúlkurnar eru sofnaðar (um 11 leitið) getum við svo karlmennin skemmt hvorum öðrum með miklum (popp)fróðleik og rökleiðslum. Þegar við höfum rökrætt okkur útí horn (um 5 leitið) getum við svo skinnídippað í jakússínum og étið afgangana af kjötinu. Konurnar vakna svo um 9 leitið og skúra, ekki af því að þær þurfa að gera það, heldur af því að þær vilja það sjálfar. Svo nudda þær okkur þegar við vöknum. Til að losna við óbragðið eftir drykkjuna úr skoltinum fáum við okkur hákarl og súrmeti.

:: HauXon föstudagur, janúar 14, 2005 [+] ::
...
|

Smá viðbót í tvífarasafnið (tíhíhíhí)

:: Valgarduz miðvikudagur, janúar 12, 2005 [+] ::
...
|

Styttist í Húsafell!!!!!!!! Eigum við ekki að athuga með möguleika á vélsleðaferð og kostnað við slíkt?

:: Valgarduz miðvikudagur, janúar 12, 2005 [+] ::
...
|

Hei - gleymdi einni mynd sem mætti alveg vera þarna einhverstaðar á rólinu 4.-6. sæti. Pieces of April er alveg frábær lítil indí-mynd. Hulstrið er ekkert sérlega aðlaðandi með mynd af aðalleikkonunni Katie Holmes (sem lék í hinum ömurlegu Dawsons weep þáttum), en innihaldið er síðan þessi líka perla. Alveg svakalega góð mynd og Katie bara með snilldarleik.

Síðan verð ég að fara að horfa á American Splendor og City of God. Þetta er náttúrlega engin frammistaða hjá manni.

:: Valgarduz miðvikudagur, janúar 12, 2005 [+] ::
...
|

Verð að taka þátt í þessum topp-5 leik með mínum hætti. Reyndar er ég enn meira út úr korti í tónlistinni er Hauxon. Mín diskakaup snúast yfirleitt um að vinna upp gamla tónlist þannig að ég enda alltaf með því að vera pínulítið átdeited í músíkkinni. Þannig var besti diskurinn sem ég eignaðist á árinu 2004 "O" með Damien Rice en hann telst örugglega ekki með vegna útgáfuársins 2003.

Ég ætla hins vegar að birta hér 5 bestu bíómyndir ársins 2004:

Nr.1: KILL BILL vol.2. Djöfulsöskrandibrilliansoggargandisnilld!!!!! Tarantino er kóngurinn og Uma er drottning hans. Blastaði þessa í nýja heimabíóinu (jólagjöfinni) um daginn og boyóboy.... þvílík unun...þvílík upplifun...þvílík djöfulsöskrandibrilliansoggargandisnilld!!!

Nr.2: MONSTER. Einhvern veginn í fjáranum fékk maður samúð með þessari snarvitlausu, morðóðu og forljótu trukkalessu. Það bendir bara til þess að það sé eitthvað meira en lítið spunnið í þá sem gerðu þessa mynd. Alveg frábær.

Nr.3: BIG FISH. Algjört æði - sjaldan verið svona GAMAN að horfa á eina mynd frá upphafi til enda. Ógeðslega skemmtileg í sínum fantastíska súrrealisma.

Nr.4: STARSKY & HUTCH. Ben Stiller er bara geðveikt fyndinn náungi. Hinn þarna Wilson svosem ágætur líka en Stiller er að mínu mati fyndnasti maðurinn í hollívúdd þessa dagana og þessi snilldarmynd var sú besta af þremur myndum með honum á síðasta ári (hinar Dodgeball og Along came Polly - ótrúleg afköst hjá kallinum).

Nr.5: SHREK2. Einn mesti gróðinn við að eiga börn er að komast á svona myndir í bíó án þess að fá á sig einhverjar niðurlægjandi spurningar eða augngotur. Ég held svei mér þá að foreldrarnir í bíó hafi hlegið meira en börnin, enda húmorinn alveg ótrúlega snjall og beinskeittur með vísanir í allar mögulegar áttir. Gosi að reyna að ljúga sig út úr G-strengs klandrinu er tvímælalaust hápunktur myndarinnar, ég meina hvernig á Gosi að geta logið með þetta nef??

Og að lokum; vonbrigði ársins: LOST IN TRANSLATION (Geeeeiiiiiisssp!!). Bill Murray er á síðasta séns hjá mér eftir þessi leiðindi og einnig fyrir að taka þátt í alveg ótrúlega lélegri mynd um Garfield. Ég meina -Garfield!! Hvernig er hægt að klúðra svo frábærum efnivið í einhverja innantóma froðumynd.

Tókuð þið eftir því að ég fór óvart að tala um Garfield í staðinn fyrir Lost in Translation. Segir nú soldið um hvað sú mynd var leiðinleg (Geeeeeiiiiiissssp).

Respect!

:: Valgarduz mánudagur, janúar 10, 2005 [+] ::
...
|

Það er hefð fyrir því að gefa út lista yfir hitt og þetta eftir hvert ár svo að hér kemur listi yfir bestu plötur sem smugu inn fyrir mín eyru á árinu, ekki í neinni sérstakri röð. Ég er svo mikið dottinn út úr músíkinni að ég get ekki einu sinni birt 5 plötur.

Interpol - Antics
Ein besta plata sem ég heyrt í nokkur ár. Verður betri með hverri hlustun. Hljómar stundum eins og Joy Division hafi gert "gleði"plötu. ...Rosemary...

Kings og Lyon - Aha Shake Heartbreak
Plata sem vinnur á. Betri en fyrsta platan sem var frábær. Skemmtilegt rokk og ról sem sándar gamalt en reynir ekki of mikið að vera "hip".

Hjálmar - Hljóðlega af stað
Fyrstu viðbrögð voru "Djísös!.. hvað er þetta eiginlega?". Svo hlustar maður áfram og fattar að þessir gaurar hljóta að vera úthverfir blökkumenn. Ég stend mig af því að spila Hjálma ótrúlega oft. Jamm og jamm og jú!!

Mugison - Mugimama is this monkey music?
Hljómar stundum eins og Portishead spilað afturábak og þess á milli eins og Beck eða Will Oldham eða eitthvað. Fínn diskur sem ég ætti að hlusta meira á. Mugison er partur af batnandi tíð í íslenskri músík.

Ég las eina bók í fyrra utan námsbókana og hún kom ekki einusinni út 2004. Hún var góð.

Hvaða myndir voru nú aftur í bíó í fyrra? Er ekki búinn að sjá hina "umdeildu" Eternal sunshine enn þá. American Splendor var góð og City of God frábær man ekki eftir fleirum góðum.

Well thats it folks!

:: HauXon sunnudagur, janúar 09, 2005 [+] ::
...
|

Hvað sem öllum listrænum ágreiningi líður þá tel ég að Kiefer Sutherland sé snillingur. Að minnsta ef marka má ummæli sem eftir honum eru höfð á mbl.is. Þar hrósar hann landanum fyrir mikla skotgleiði til heiðurs Ríkum á gamlárskvöld.

Hann segir meðal annars. "Þetta er eins og stríðssvæði. Það er ekkert skipulag ... ég sá sex ára krakka halda á 15 kílóa sprengjuvörpu og annar sex ára krakki elti hann með eldspýtur." Þetta er bara snilld.

:: Gmaríus föstudagur, janúar 07, 2005 [+] ::
...
|

Þá er 2005 gegnið í garð!

Óska lýðnum til hamingju með okkur.

:: Gmaríus laugardagur, janúar 01, 2005 [+] ::
...
|